Amafoto:Reba urutonde rw’abakinnyi 12 b’Abongereza bashobora guhindura amakipe muri iyi mpeshyi n’aho bashobora kwerekeza
Ahabanza Imikino
Yanditwe: Dusingizimana Remmy
5 months ago Yasuwe: 1380

Muri iyi mpeshyi amakipe menshi arajwe ishinga no kugura ndetse no kurekura abakinnyi aho benshi mu bakinnyi b’Abongereza bari kuvugwa cyane ku isoko ndetse biteganyijwe ko benshi bazahindura amakipe. Uru ni urutonde rw’abakinnyi 12 b’ Abongereza bashobora gusohoka mu makipe yabo dukesha Ikinyamakuru Dailymail.

1.DANIEL STURRIDGE (LIVERPOOL)


Uyu musore wibasiwe n’imvune ashobora kuva mu ikipe ya Liverpool nyuma y’aho mu mwaka ushize byagaragaye ko atari muri gahunda z’umutoza Jurgen Klopp nyuma kuko inshuro nyinshi yazaga mu kibuga asimbuye.

Ashobora kwerekeza mu ikipe ya Westham cyangwa mu Bufaransa mu ikipe ya Paris Saint Germain dore ko yigeze kuvuga ko imukeneye aho bivugwa ko ikipe yose ifite miliyoni 40 z’amapawundi yaza ikagura uyu musore.

2.ROSS BARKLEY(EVERTON)


Uyu musore ukiri muto aherutse gutangaza ko atifuza kuguma mu ikipe ya Everton aho yasabye ko kugira ngo ahagume iyi kipe yamuhemba ibihumbi 180 by’amapawundi ku cyumweru ibintu byagoye ikipe ya Everton.

Uyu musore usigaje umwaka umwe ku masezerano ye ashobora kwerekeza mu ikipe ya Tottenham cyangwa Chelsea aho igiciro cyo kumugura kigeze kuri miliyoni 35 z’amapawundi.

3.JACK WILSHERE (ARSENAL)


Uyu musore w’umuhanga wishwe n’imvune amaze umwaka yaratijwe n’ikipe ye ya Arsenal mu ikipe ya Bournemouth aho bivugwa ko uyu musore atakiri muri gahunda y’umutoza Arsene Wenger kubera ko iyi kipe ifite abakinnyi benshi bakina ku mwanya umwe n’uyu mwongereza.

Biravugwa ko ashobora kongera gutizwa cyangwa akagurishwa muri Bournemouth cyangwa se akerekeza mu ikipe ya A C Milan yifuza kumusimbuza Gerrard Deulofeu ugiye kwerekeza mu ikipe ya FC Barcelona.

4.MICHEAL KEANE(BURNLEY)


Uyu mwongereza ukina mu bwugarizi bwa Burnley ashobora kutayigumamo cyane ko amakipe amwifuza ari uruhuri kubera ubuhanga uyu mnyugariro yagaragaje bwafashije ikipe ya Burnley kuguma mu cyiciro cya mbere uyu mwaka.

Ikipe imwifuza irasabwa gutanga akayabo ka miliyoni 28 z’amapawundi aho amakipe nka Everton,Tottenham na Liverpool zifuza kugura uyu myugariro.

5.ALEX OXYLADE CHAMBERLAIN (ARSENAL)


Uyu musore ukundwa n’abongereza kubera ukuntu yihuta cyane nawe aravugwa gusohoka muri Arsenal akerekeza ahandi cyane ko asigaje umwaka umwe ku masezerano ye n’iyi kipe.

Uyu musore yanenzwe cyane n’umutoza we ko adahozaho mu mikinire ye cyane ko uko akinnye uyu munsi atari ko abigenza mu mukino ukurikiyeho.
Aramutse atongereye amasezerano na Arsenal ashobora kwerekeza mu ikipe ya Liverpool cyangwa Chelsea zimwifuza cyane.

6.FABIAN DELPH (MANCHESTER CITY)


Hari abantu benshi batibuka ko uyu musore akina mu ikipe ya Manchester City kubera ukuntu yicaye cyane ku ntebe y’abasimbura.Biravugwa ko iyi kipe yiteguye kurekura uyu mwongereza cyane ko atari mu mishanga y’umutoza Pep Guardiola.

Uyu musore w’imyaka 27 ashobora kwerekeza mu ikipe ya Celtic ku kayabo ka miliyoni 12 z’amapawundi.

7.ERIC DIER (TOTTENHAM)


Nyuma y’aho abasore 2 Moussa Dembele na Victor Wanyama bafashe umwanya uhoraho mu ikipe ya Tottenham uyu musore yabuze umwanya burundu byatumye umwaka w’imikino ushize akina imikino mbarwa .Biravugwa ko uyu musore atishimiye kuguma muri Tottenham aho yifuza kuyisohokamo.

Uyu musore akundwa cyane n’umutoza Jose Mourinho ku buryo ngo uyu mutoza yiteguye kumugura agahita anamwongerera umushahara nubwo ikipe ya Tottenham yavuze ko yamurekura ari uko ikipe imwifuza itanze akayabo ka miliyoni 50 z’amapawundi.

8.BEN GIBSON (MIDDLESBROUGH)


Nubwo uyu musore ukina yugarira atazwi cyane n’abantu benshi uyu n’umwe mu bakinnyi bigaragaje mu mwaka w’imikino ushize ubwo yageragezaga gufasha ikipe ya Middlesbrough nubwo byarangiye isubiye mu cyiciro cya kabiri.

Uyu musore yashimishije abatoza b’amakipe menshi mu Bwongereza ndetse biteguye gutanga miliyoni 30 z’amapawundi ikipe ye iri gusaba ngo imurekure.

Biravugwa ko ashobora kwerekeza mu ikipe ya Liverpool,Tottenham na Chelsea zimwifuza cyane dore ko aherutse guhamagarwa mu ikipe y’igihugu y’abongereza mu kwezi kwa gatatu uyu mwaka.

9.CHRIS SMALLING (MANCHESTER UNITED)


Uyu musore ukina mu ikipe ya Manchester United yugarira ari ku rutonde rw’abasohoka muri iyi kipe cyane ko atashimishije umutoza we Jose Mourinho aho yagiye akora amakosa menshi yatumye ashyirwa ku gatebe k’abasimbura byanatumye iyi kipe ijya ku isoko igura umunya Sweden Victor Linderof.

Ashobora kwerekeza mu ikipe ya Newcastle,Everton cyangwa Tottenham.

10.RYAN BERTRAND(SOUTHAMPTON)


Nubwo uyu musore ashimwa n’abatari bake kubera ubuhanga bwe mu kugarira uyu mwongereza biravugwa ko atacyifuza gukina mu ikipe y’abatagatifu aho yifuza kujya mu makipe akomeye.

Amakipe nka Manchester City na Liverpool arifuza bikomeye uyu musore w’umuhanga mu Bwugarizi.

11.KYLE WALKER(TOTTENHAM)


Uyu musore wigaragaje mu mwaka w’imikino ushize aravugwa cyane mu bitangazamakuru ko ashaka gusohoka mu ikipe ya Spurs aho yifuza kujya mu makipe akomeye agatwara ibikombe aho ikipe ya Spurs yatangaje ko ushaka uyu musore agomba gutanga miliyoni 40 z’amapawundi.

Ku isonga mu makipe amushaka haraza ikipe ya Manchester City ndetse na Bayern Munich.

12.JOE HART (MANCHESTER CITY)


Uyu muzamu nimero ya mbere y’ubwongereza umaze umwaka wose yaratijwe mu ikipe ya Torino mu Butaliyani, arifuza gusohoka mu ikipe ya Pep Guardiola wavuze ko adakunda uyu musore.

Amakipe amushaka arangajwe imbere na Liverpool imaze igihe inengwa ku mahitamo igira ku banyezamu bayo,aho yifuzwa kandi n’amakipe nka Westham n’izindi.

Ibitecyerezo

Imikino

ANDI MAKURU