“Ntabwo ari njyewe gusa bambitse ubusa …Imana izahora igihe nikigera” Diane Rwigara
Ahabanza Amakuru Mu Rwanda
Yanditwe: Nsanzimana Ernest
June 2017 Yasuwe: 11384

Diane Shimwa Rwigara, umukobwa wa Nyakwigendera Assinapol Rwigara ushaka kwiyamamariza kuyobora u Rwanda yongeye kuvuga ku mafoto yakwirakwiye y’ umuntu w’ igitsina gore wambaye ubusa buriburi, avuga ko abakoze ariya mafoto atari we gusa bambitse ubusa ahubwo babwambitse Abanyarwandakazi bose.

Yabitangarije Abanyamakuru kuri uyu wa Kabiri tariki 20 Kamena 2017 ubwo yari amaze gushyikiriza komisiyo y’ igihugu y’ amatora ibyangombwa bye nk’ umuntu ushaka kwiyamamariza kuyobora u Rwanda.

Nyuma y’ igihe gito Diane Rwigara atangaje ko aziyamamariza kuyobora u Rwanda hari amafoto bivugwa ko ariye aye yambaye ubusa yakwirakwijwe. Umunyamakuru yamubajije niba aya mafoto atamubera imbogamizi mu rugendo arimo rwo kwiyamamariza kuyobora Abanyarwanda.

Ati “Icyo kibazo cy’ amafoto nari naragisubije, ariko nagusubiza vuba vuba. Abakoze biriya bintu by’ amafoto nibo bagombye gukurikiranwa ahubwo bakanahanwa mu gihugu kitwa ko kigendera ku mategeko, abantu babikoze nibo mwagombye kubazwa ibyo bibazo”

Yongeyeho ati “Hari n’ abambaza ngo kuki utareze, ngasubiza nti ‘ni ukurega uwo uregera’”

Diane Rwigara avuga u Rwanda ari igihugu kivuga ko kirengera uburenganzira bw’ abagore, ndetse gifite n’ abagore benshi. Nyamara ngo nta mugore watinyutse kwamagana ariya mafoto.

Ati “Inzego zacu zo mu Rwanda, zirimo abagore benshi ariko n’ abagore bari muri izo nzego biriya bintu ntabwo bigeze babyamagana, ariko bikaba biva ku bwoba. Nigeze kuvuga ko muri iki gihugu ntawe uvuga ahantu hose hari ubwoba…”

“Ntabwo ari njyewe bambitse ubusa gusa, ahubwo babwambitse Abanyarwandakazi bose, nubwo bicecekeye”

Diane Rwigara yahakanye amakuru avuga ko ashaka kwihorera

Hari amakuru yatangajwe mu binyamakuru avuga ko Diane Rwigara yiyamamarije kuyobora u Rwanda kugira ngo azihorere kubera urupfu rwa Se Assinapol Rwigara rutavuzweho rumwe.

Uyu mukobwa avuga ko we adashobora kwihorera kuko guhora ari ukw’ Imana kandi ngo afite icyizere ko igihe nikigera Imana izahora.

Ati “Njyewe ntabwo nemera kwihorera kw’ abantu, guhora ni ukw’ Imana, kandi izahora igihe cyayo nikigera”

Yunzemo ati “Ibyambayeho byatumye numva akababaro n’ agahinda kari mu banyarwanda benshi. Niyo mpamvu nshikama mvuga ko ari njyewe ufite ubushishozi n’ ubushobozi bwo gukemura ibibazo by’ akarengane kuko nanjye ubwanjye nabibayemo”

Diane Rwigara niwe mukobwa rukumbi utanze kandidatire ye. Ayitanze nyuma ya Dr Frank Habineza watanzwe n’ ishyaka DGPR, Umukandida wigenga Mwenedata Gilbert na Barafinda Ssekikubo Fred bazitanze tariki 12 Kamena 2017.

Avuga ko yarengeje umubare w’ amasinya NEC isaba umukandida wigenga ushaka kwiyamamariza kuyobora u Rwanda. Iyi komisiyo isaba amasinya 600 ariko we avuga ko yasinyishije amasinya 929. Ngo amatora naramuka akozwe mu mucyo ntihabemo akarengane azayatsinda.

Kwiyamamariza umukuru w’ igihugu cy’ u Rwanda byasabye Diane Rwigara gusubiza ubwenegihugu bw’ u Bubiligi yari afite kuko ntawemerewe kwiyamamariza uyu mwanya afite ubwenegihugu bubiri.

Perezida Kagame uherutse kwemezwa nk’umukandida uzahagararira Umuryango FPR Inkotanyi mu matora ya Perezida aho kugeza ubu ashyigikirwa kandi n’andi mashyaka nka PSD, PL na PPC, ntaratanga ibyangombwa kuri Komisiyo y’Igihugu y’Amatora.

Kwakira kandidatire ku mwanya wa Perezida wa Repubulika byahereye ku wa 12 Kamena bikazarangira ku wa 23 Kamena 2017.

Ibitecyerezo

Politiki

ANDI MAKURU