Diane Rwigara yatangije muvoma avuga ko igamije guharanira uburenganzira bw’ abaturage
Ahabanza Amakuru Mu Rwanda
Yanditwe: Nsanzimana Ernest
July 2017 Yasuwe: 14247

Kuri uyu wa Gatanu tariki 14 Nyakanga 2017, Diane Shima Rwigara yatangije muvoma yise People Salvation Movement (PSM- Itabaza).

Uyu mukobwa yatangije iyi muvoma nyuma y’ aho yari yatanze kandidatire ku mwanya wa Perezida wa Repubulika ariko akaba atarisanze ku rutonde rw’ abemerewe kwiyamamaza.

Mu kiganiro yahaye abanyamakuru kuri uyu wa 14 Nyakanga 2017 ubwo yatangazaga ko atangije iyi muvoma yavuze ko atangije iyi muvoma nyuma y’ aho yagerageje gusaba uburenganzira nta buhabwe.

Avuga ko yabikoze abizi ngo n’ ubusanzwe uburenganzira ntibusabwa buraharanirwa.

Uyu mukobwa yavuze amagambo akomeye avuga ko ngo byagaragaye ko Abanyarwanda bahagurukira rimwe ari uko bagiye kwica, avuga ko bikwiye ko Abanyarwanda bahagurukira rimwe bakamagana ikibi kabone n’ ubwo cyaba cyateguwe n’ ubutegetsi.

Yavuze ko raporo za banki y’ isi zigaragara ko uretse u Burundi, u Rwanda aricyo gihugu gikennye kurusha Uganda, Tanzania na Kenya.

Ati “Ibipimo bya banki y’ Isi byerekana ko 80% by’ Abanyarwanda ari abakene. Umusaruro mbumbe ku munyarwanda ni amadorali 697 ku mwaka, Uganda ni 705, Tanzania ni 879, Kenya ni 1375 urumva ko mu bihugu bikennye kuri iyi Si u Rwanda ni urwa mbere mu karere k’ ibiyaga bigari ukuyemo u Burundi”

Yifashishije ibipimo bya RURA yavuze ko mu Rwanda ingo zifite amashanyarazi ari 9,6%, ingo zifite amazi ngo 2,9% , mu buvuzi ngo umudogiteri umwe avura abantu 2000 nyamara amabwiriza ya OMS avuga ko umudogiteri umwe yakagombye kuvura abantu 1000.

Uyu mukobwa kandi yavuze ko nubwo atagaragaye ku rutonde rw’ abemerewe kwiyamamaza ngo yari yatanze ibyangombwa byose. Avuga akomeje ko yari gutsinda FPR 100% iyo aramuka yemerewe kwiyamamaza, agakemanga ubushobozi bwa komisiyo y’ amatora avuga ko yakoreshejwe mu kuburizamo kandidatire.

Diane yavuze ko ubutegetsi bwa FPR bwubakiye ku kinyoma ibi ngo bituma idatinya umuntu urwanisha imbunda ahubwo igatinya guhangana n’ umuntu ukoresha ukuri.

Diane Rwigara mu kiganiro n’itangazamakuru

Yavuze ko akarengane gakorerwa abaturage babuzwa guhinga icyo bashaka, kuba ngo hari abicwa batageze imbere y’ ubutabera, n’ ibindi ari byo bitumye atangiza PSM- itabaza.

Yagize ati “Niyo mpamvu rero ntangije iyi muvoma ishingiye ku kuri itinyura abantu bagaharanira uburenganzira bwabo mu mahoro”

Diane Rwigara yavuze ko iyi muvoma ntaho yanditse mu mategeko avuga ko icyo umuntu yandikisha ari ishyaka ashimangira ko atari ngombwa kwandikisha muvoma.

Avuga ku itandukaniro rya muvoma n’ ishyaka yavuze ko ishyaka riba rigamije kugera ku butegetsi mu gihe muvoma yo iba igamije impinduka.

Uretse icyo kandi ngo umuntu ashobora kuba muri muvoma runaka bitamubujije kuguma mu ishyaka yari arimo.

Ahenshi muri Afurika ubutegetsi bufitwe n’ ababugezeho bakoresheje imbunda. Diane Rwigara abajijwe ubunararibonye afite muri politiki yavuze ko ibyo kugera kubutegetsi hifashishijwe imbunda byarangiranye n’ igihe cyabyo.

Diane Rwigara anenga gahunda yo kubaka amazu ahenze nka Kigali Convention Center akavuga ko aho gutanga amafaranga menshi kuriya hubakwa inzu zihenze ayo mafaranga yakoreshwa mu mishanga yo kuzamura imibereho y’ abaturage.

Ibitecyerezo

Mu Rwanda

ANDI MAKURU